भोजपुर: भोजपुरमा ट्रयाक्टर दुर्घटना हुँदा एक जनाको ज्यान गएको छ । दुई जना घाइते भएका छन् । जिल्लाको दक्षिण आमचोक गाउँपालिका दुम्मानामा आज राती भएको दुर्घटनामा परि ट्रयाक्टर चालक आमचोक गाउँपालिका ४ बालंखाका २५ वर्षीय भविन्द्र राईको ज्यान गएको हो ।

दुर्घटनामा महोत्तरी जिल्ला घर भएका सहचालक ४० वर्षीय हरि खत्री र आमचोक गाउँपालिका १ बस्ने शंकर कार्की घाइते भएको जिल्ला प्रहरी कार्यालय भोजपुरले जानकारी दिएको छ । कार्कीको अवस्था गम्भीर रहेकोले उनलाई थप उपचारका लागि धरानस्थित विपी कोइराला स्वास्थ्य विज्ञान प्रतिष्ठान लगिएको छ ।

घोडेटारबाट बालंखातर्फ आउँदै गएको ना ५ त ९४३२ नम्बरको ट्रयाक्टर अनियन्त्रित भई दुम्मानाको कामीडाँडा भन्ने ठाउँमा सडकबाट झण्डै ८ सय मिटर तल झरेको जिल्ला प्रहरी कार्यालय भोजपुरका प्रहरी निरीक्षक पाण्डपकुमार राजवंशीले बताएका छन् ।