इटहरीः होटल व्यवसायी संघ इटहरीका अध्यक्ष जीवन पराजुली उद्योग वाणिज्य संघ(उवासंघ)को कार्यसमितिमा जान चुनाव लड्ने भएका छन् । लायन्स क्लब अब इटहरी सिटीका अध्यक्ष समेत रहेका पराजुली आगामी असार १४ गते हुने उवासंघ इटहरीको कार्यसमिति सदस्य पदको लागी चुनाव लड्ने भएका हुन ।
सन २००५ मा जेसिस प्रवेश गरेका पराजुली २०१३ मा तरहरा जेसिसका अध्यक्ष हुँदै सन २०१४ मा केन्द्रीय उपाध्यक्ष समेत भएका थिए । अध्यक्षका प्रत्यासी भीम पौडेलको प्यानलबाट चुनाव लड्ने पराजुलीले आफूले होटल व्यवसायी संघ, लायन्स, जेसिस र अन्य सामाजिक नेतृत्वको अनुभव उवासंघमा सदुपयोग गर्न चुनाव लड्ने बताए ।
इटहरीमै जन्मीहुर्की सपरिवार व्यवसायमा लागेको र यहाँका व्यवसायीको मर्काहरू नजिकबाट बुझेकाले व्यवसायीको छाता संगठनमा जान इच्छुक भएको पराजुलीले बताए । उनले भने, ‘व्यवसायीको हकहित र करजन्य समस्याहरूको बारेमा व्यवसायीहरूलाई सहयोग गरौँ भनेर छाता संगठनमा जानलाई म उवासंघ कार्यसमितिको लागी चुनावी तयारीमा रहेको छु ।’
करिब ८ हजार हाराहारी व्यवसायीहरू रहेको इटहरीको व्यवसायीहरूको छाता सङ्गठन उवासंघको चुनावमा दुई प्यानल प्रतिस्पर्धामा छन् । एकातिर कार्यवाहक अध्यक्ष शैलेश विष्टको प्यानल छ भने अर्कोतिर कार्यसमिति सदस्य भीम पौडेल नेतृत्वको प्यानल रहेको छ ।
प्यानल भनेको प्राविधिक र राजनीतिक विषय मात्रै भएको बताउँदै पराजुलीले आफूलाई दुवै प्यानलका व्यापारीको साथ हुने बताए । उनले भने, ‘प्राविधिक रूपमा दुई प्यानल भए पनि हरेक चुनावहरूमा आम व्यवसायीहरूले प्यानल मात्रै हेरेर भोट हाल्नुहुन्न ।’
_1720278409.jpg)
