धरानः इलाका प्रहरी कार्यालय धरानले विभिन्न किसिमका हतियार र लागूपदार्थसहित पक्राउ परेका ३ जनालाई पत्रकार सम्मेलन गरी सार्वजनिक गरेको छ ।
आज बिहान १ बजेदेखि साढे २ बजेको बीचमा उनीहरूको घर र कोठा खानतलासी गरी सामान बरामद गर्नुका साथै अपराधमा संलग्नलाई पक्राउ गरिएको प्रहरीले जनाएको हो ।
गोप्य सूचनाको आधारमा इलाका प्रहरी कार्यालय धरानका प्रहरी नायब उपरीक्षकको कमाण्डमा खटिएको प्रहरी टोलीले सर्च अप्रेसन गरेको जनाएको छ । त्यस क्रममा प्रहरीले धरान– १५ का ३९ वर्षीय सरोज गुरुङलाई पक्राउ गरेको हो । त्यस्तै, धरान–११ मा प्रवीण राईको घरमा डेरा गरी बस्ने २९ वर्षीय विजय राई र ३१ वर्षीय सुरेश राई पक्राउ परेका हुन् । प्रहरीका अनुसार विजय भोजपुरको आमचोक– ६ का स्थायी बासिन्दा हुन् भने सुरेश भोजपुरको हतुवागढी – २ का स्थायी बासिन्दा हुन् ।
प्रहरीले SUNMICA,INDUSTRIAL लेखिएको पेस्तोल २ (दुई) थान र सो पेस्तोलमा लाग्ने म्यागजिन १ थान पक्राउ परेकाबाट बराबद गरेको जनाएको छ । त्यस्तै, ०७ लेखिएको पेस्तोलको गोली १० थान र ७.६२ लेखिएको एसएलआरमा प्रयोग हुने १४ थान गोली र ७.६५ लेखिएको १ थान गोली बरामद भएको जनाएको छ ।
त्यसैगरी, लागूऔषध डाइलेक्स डीसी ४ बोतल, खैरो हिरोईन २ ग्राम ७ सय ३० मिलिग्राम र २ थान खुकुरी पनि उनीहरूबाट बरामद भएको जनाएको छ ।. फलामको नक एउटा, मुखुण्डो ३ ओटा, डाइसको गोटी ६ ओटा, ३ ओटा मोबाइल, ३ ओटा मोटरसाइकल र नगद १५ हजार १ सय ३५ रुपैयाँ बरामद भएको प्रहरीले सार्वजनिक गरेको छ ।
_1720278409.jpg)
