बेलबारीः मोरङको बेलबारी–२ मा शनिबार राति आगलागी हुँदा एक किराना पसल जलेर नष्ट भएको छ ।

राति १० बजेतिर भएको आगलागीमा कल्पना बस्नेतको घरमा डेरा गरी बस्ने उमा श्रेष्ठको किराना पसलमा आगो लागेको थियो । आगलागीबाट अढाई लाख रुपैयाँभन्दा बढीको क्षति भएको वडाध्यक्ष घनश्याम गौतमले बताए ।

आगोका कारण पसलमा भएका सबै सामग्री जलेका थिए भने घरमा समेत क्षति पुगेको बताइएको छ । आगलागीको कारण भने खुल्न सकेको छैन । विद्युत सट भएर आगो लागेको हुन सक्ने इलाका प्रहरी कार्यालय बेलबारीका प्रमुख रामकुमार राईले बताए ।