धरानः सडकमा गुडिरहेको गाडीले हिलो छयापिदिएको निहुँमा छुरा प्रहार गर्ने २ जनालाई इलाका प्रहरी कार्यालय धरानले पक्राउ गरेको छ ।

मङ्गलबार बिहान धरान–६ बस्ने काजीमान तामाङले चलाएको सवारीले हिलो छ्यापिदिएको भन्दै उनीमाथि छुरा प्रहार भएको थियो । तामाङकै घरमा गई वादविवाद गरी कोखामा छुरा प्रहार गरी फरार रहेका धरान–६ का वसन्त लिम्बू र भोजपुरको रामप्रसाद राई गाउँपालिका बस्ने हाङकोप राईलाई प्रहरीले पक्राउ गरेको हो ।

प्रहरीका अनुसार घाइते तामाङ धरानस्थित बीपी कोइराला स्वास्थ्य विज्ञान प्रतिष्ठानमा उपचार गराइरहेका छन् भने घटनामा संलग्न लिम्बू र राईलाई छुरासहित पक्राउ गरी थप अनुसन्धान भइरहेको छ ।