धरानः हिजो साँझ ८ बजे धरानको तीनकुनेबाट सवारी साधन तथा शङ्कास्पद व्यक्तिको शरीर र झोला जाँच गर्ने क्रममा लागूऔषधसहित २ जनालाई प्रहरीले पक्राउ गरेको छ ।

सवारी जाँचमा खटिएको प्रहरी टोलीले इटहरीबाट धरानतर्फ आउँदै गरेको बसमा सवार यात्रुको जाँच गर्ने क्रममा उनीहरू पक्राउ परेको प्रहरीले जनाएको छ । प्रहरीका अनुसार धरान उपमहानगरपालिका वडा न. २ बस्ने ३० वर्षीय सनम शाक्य र वडा न. ८ बस्ने ३६ वर्षीय अभिषेक तामाङ पक्राउ परेका हुन् ।

तामाङले बोकेको झोलाको भित्री भाग सिलाएको अवस्थामा रहेको हुनाले सो सिलाएको भाग उधार्दा लुकाइछिपाई राखेको लागूऔषध फेला परेको प्रहरीले जनाएको छ । उनीहरूको साथबाट लुपिजेसिक ८१ एम्पुल, एभिल ८१ एम्पुल, डाईजेलाप ८१ एम्पुल बरामद भएको र उनीहरूमाथि थप अनुसन्धान भइरहेको प्रहरीले जनाएको छ ।