इटहरीः आज प्रहरी प्रधान कार्यालयले ७९ जना प्रहरी नायब उपरीक्षक (डीएसपी) को सरुवा गरेको छ । यसरी सरुवा हुनेमा केही डीएसपी पूर्व क्षेत्रका पनि परेका छन् ।

को गए, को आए ?
जिल्ला प्रहरी कार्यालय सुनसरीका ज्ञानेन्द्रप्रसाद फुयाल जिल्ला प्रहरी कार्यालय ताप्लेजुङमा सरुवा भएपछि उनको ठाउँमा जिल्ला प्रहरी कार्यालय कालिकोटमा कार्यरत विनोद शर्मा आउने भएका छन् । जिल्ला प्रहरी कार्यालय ताप्लेजुङका सञ्जयसिंह थापा प्रहरी प्रधान कार्यालयमा सरुवा भएका छन् ।

जिल्ला प्रहरी कार्यालय तेह्रथुमका टेकबहादुर कार्की क्षेत्री प्रहरी प्रधान कार्यालय सुरक्षा सेवा व्यवस्थापन शाखामा सरुवा भएका छन् । उनको ठाउँमा प्रहरी प्रधान कार्यालयका नवीनकिशोर श्रेष्ठ आउने भएका छन् ।

इलाका प्रहरी कार्यालय इटहरीका समीरचन्द्र खनालको ठाउँमा जिल्ला प्रहरी कार्यालय रुपन्देहीका धर्मराज भण्डारी आएका छन् । खनाल भने प्रहरी प्रधान कार्यालयको वैदेशिक समन्वय महाशाखामा सरुवा भएका छन् ।

जिल्ला प्रहरी कार्यालय पाँचथरका नरेन्द्र कुँवर सङ्घीय प्रहरी इकाइ कार्यालय धरानमा आउने भएका छन् । सो कार्यालयका वीरेन्द्र गोदार भने प्रहरी प्रधान कार्यालय काठमाडौं सरुवा भएका छन् ।

१ नम्बर प्रदेश प्रहरी कार्यालय अभियोजन विराटनगरका सिद्धराज न्यौपाने जिल्ला प्रहरी कार्यालय पाँचथरमा खटिने भएका छन् । न्यौपानेको ठाउँमा २ नम्बर प्रदेश प्रहरी कार्यालय जनकपुरबाट सुमनकुमार तिमल्सिना आउने भएका छन् ।

महानगरीय प्रहरी परिसर ललितपुरका नारायणप्रसाद चिमरिया जिल्ला प्रहरी कार्यालय सोलुखुम्बु सरुवा भएका छन् । सोलुखुम्बुका शालिग्राम शर्मा जिल्ला प्रहरी कार्यालय चितवनमा सरुवा भएका छन् ।