इटहरीः लकडाउनलाई कडाइ गर्ने नाममा आइतवार बेलुका गाँउ पसेका शसस्त्र र जनपथ प्रहरीले स्थानीयलाई जथाभावी कुटपिट गरेको स्थानीयले आरोप लगाएका छन् । प्रहरीको लाठ्ठी चार्जबाट स्थानीय १० जना घाइते भएका छन् ।
बेलुका करिब ७ बजेको समयमा सुन्दरहरैंचा ६ पूर्व फिमरा, बाँसबारी र तिनपैनी क्षेत्रमा हातमा लाठ्ठी बोकेर आएका शसस्त्र र जनपथ प्रहरीले जथाभावीरुपमा स्थानीयलाई कुटपिट गरेका हुन् ।
अनुसन्धान नै नगरि लकडाउनमा घर बाहिर किन निस्किएको भन्दै आपत परेर खाद्यन्नको समान र औषधी खरिद गर्न हिडेकालाई कुटपिट गरेको स्थानीयले दावी गरेका छन् । प्रहरीले खेतबारीमा काम गरेर घर फर्किदै गरेका किसानहरुलाई समेत कुटपिट गरेको उनिहरुले बताएका छन् । कुटपिटमा उत्रिएका प्रहरीलाई आफुहरुकै नेतृत्वमा केही दिनअघि मात्र प्रहरीलाई क्लबको तर्फबाट पिउने पानी वितरण गरेको कुटाई खाने युवाहरुले बताए ।
प्रहरीको लाठ्ठी खाएका स्थानीय एक युवाले भने –‘म आफ्नो घरको आँगनमा बसिरहेको थिए । एक्कासी भ्यानमा आएका प्रहरी भटाभट भ्यानबाहिर आएर अन्धाधुन्ध लाठ्ठी बर्षाउने काम गरे । आफ्नै घरको आँगन सिकुवामासम्म बस्नै नहुने भन्ने कुरा त नहोला । कोरोना भाइरसको फैलदो संक्रमण र लकडाउनका बिषयमा सबै जानकार छौं, हामी तर कुनै नबुझी प्रहरीले जथाभावी कुट्न मिल्छ ?’
प्रहरीले महिला, केटाकेटीहरुलाई पनि जथाभावी कुटपिट गरेको स्थानीयले आरोप लगाए । प्रहरीले स्थानीयलाई घर घरमा प्रवेश गरि कुटपिट गरेपछि आक्रोशित स्थानीयले तत्कालै सोही वडाका वडाअध्यक्ष जीवन राईलाई फोन गरेर जानकारी गराएका थिए । वडा अध्यक्ष राईले भोलि वडा कार्यालय आउनु भनेका थिए ।
वडा नम्बर ६ का अध्यक्ष राईले केही युवाहरु प्रहरीले अन्धाधुन्ध घरबाहिर बसिरहेको बेला कुटपिट गरेको भन्दै सोमबार(आज) बिहान १० बजे वडा कार्यालय आएको बताए । वडा कार्यालय आएका युवाहरुले निलडाम पनि आफुलाई देखाएको उनले बताए ।
निलडाम नै बस्ने गरि कुट्नु भन्दा सम्झाई बुझाई गर्नु पर्नेमा के कति कारणले प्रहरीले त्यसरी कुटपिट गरेका हुन ? भन्ने बुझ्न गछियामा रहेको जनपथ प्रहरीका सईलाई वडा कार्यालयबाटै आफुले फोन गरेको राईले बताए । सईले अन्धाधुन्ध कुटपिटमा जनपथ प्रहरीले नगरेको सो स्थानमा शसस्त्र प्रहरीले गरेको जवाफ दिएको वडा अध्यक्ष राईले बताए । पछि शसस्त्र प्रहरीलाई बुझ्दा हामीबाट होइन, जनपथबाट भएको हो भन्ने जवाफ आएपछि नगरपालिकाका मेयर साबलाई घटना बारे जानकारी गराएको वडा अध्यक्ष राईले बताए । मेयरले घटनाबारे सबै जानकारी लिएको र त्यसरी जथाभावी गाँउ र घरमा प्रवेश गरेर बिना कारण कुटपिट गरेको भए दुवै प्रहरीका स्थानीय प्रमुखहरुसंग कुरा राख्ने आश्वासन दिएको वडा अध्यक्ष राईले बताए । मेयरले भनेका सबै कुरा पिडित युवाहरुलाई जानकारी गराएपछि वडा कार्यालयबाट घरतर्फ गएको उनले बताए । उनले भने–‘ गाँउघरमा लकडाउनको पालना अलिक फितलो भएकै छ । तर सम्झाई बुझाई गर्नु पर्ने ठाँउमा त्यसरी कुटपिट नै गर्नु चाँही उचित होइन, केटाहरुले निलडाम बस्ने गरि प्रहरीबाट कुटाई खाएको चाँही सत्य हो ।’
वडा अध्यक्षले घटना बारे फोन मार्फत जानकारी गराएपछि आफुले शसस्त्र र जनपथ प्रहरीका प्रमुखहरुसँग कुराकानी गरेको सुन्दरहरैंचाका मेयर शिबप्रसाद ढकालले बताए । प्रहरी प्रमुखहरुले स्थानीयले भने अनुसार प्रहरीले जथाभावी कुटपिट कसैलाई नगरेको जवाफ दिएको ढकालले बताए । वडा नम्बर ५ पूर्व फिमरामा करिब १५ जनाको समूहमा युवाहरु भेला भएका र सम्झाउदा प्रहरीसंगै मुखलागेपछि धपाउने काम मात्र भएको जानकारी प्रहरी प्रमुखले आफुलाई दिएको मेयर ढकालले बताए ।
कोरोना संक्रमणले विश्वनै आक्रान्त पारेको छ । नेपाललाई कोरोनाको संक्रमणबाट जोगाउन तीन तहकै सरकार लागि परेको छ । देश पूर्ण लकडाउनमा छ । यो बेला सबै नागरिकले यसको महत्व बुझ्नु पर्ने मेयर ढकालले बताए । अनावश्यक रुपमा भेला हुने हो हल्ला गर्ने समय होइन, अहिले । अहिले त सबैले लकडाउनलाई पूर्ण पालना गरि सहयोग गर्नुपर्छ । उच्च मनोबलका साथ नागरिकको सुरक्षामा खटिएका प्रहरीलाई साथ दिनु पर्नेमा मेयर ढकालले जोड दिए । नागरिकको सुरक्षाका लागि खटेका प्रहरीले पनि ध्यान पुर्याएर आफ्नो कर्तव्य पुरा गर्नु पर्ने मेयरको भनाई छ । उनले शहर बजारका लागि मात्र सरकारले लकडाउन गरेको जस्तो बुझाइका कारण गाँउ गाँउ अझैपनि मानिसहरु घर बाहिर निस्कने गरेको बताए । उनले भने –‘हामीले विपन्न, श्रमिकहरुलाई घर घरमै खाद्यान्नका सामाग्रीहरु पुर्याएकै छौं । अनि केका लागि घर बाहिर निस्कने । कोरोना भाइरसले गाँउ शहर त भन्दैन त । यो कुरा आम नगरवासीले राम्रोसंग बुझ्न जरुरी छ ।’
उनका अनुसार सुन्दरहरैंचा ५ बाट प्रहरीले सोमबार पनि २५ जना भन्दा बढी भेला भएर फुटबल खेलिरहेका युवाहरुलाई लखेट्ने काम गरेको बताए । आफै धेरै पटक वडाहरुमा जाँदा धेरैको संख्यामा भेला भएर कुराकानी गर्ने कार्य जारी राखेको पाएको मेयर ढकालले बताए । त्यसो गर्नु आफ्ना, आफ्ना परिवार र देशका लागि हालको परिस्थितीमा धातक हुने उनले बताए ।
_1720278409.jpg)
