जनकपुरधामः कान्छी सालीको प्रेममा परेका एक भिनाजुले आफ्नी श्रीमतिको हत्या गरेका छन् । हत्या गरि घर नजिकैको जंगलमा खाल्डो खनेर गाडेको श्रीमतिको शब ४ दिनपछि प्रहरीले सढेको अवस्थामा निकालेको छ । मृतक विणाको ४ वर्षकी एक छोरी र साढे दुई वर्षका एक छोरा छन् ।
धनुषा जिल्लाको मिथिला नगरपालिका वडा नं ९ लालभिट्टीका २८ वर्षिय हरि चौहानले आफ्नी कान्छी सालीसँगको प्रेम सम्बन्धका कारण आफ्नो श्रीमती २५ बर्षीया विणा चौहान लामाको ४ दिन अघि हत्या गरेका हुन् ।
श्रीमतीले तिम्रो अवैध सम्बन्ध मेरो कान्छी बहिनीसँग छ, तिमी जहिले नि ढिलोगरि घर आउँछौ भनेर मानसिक यातना दिँदै आएकोले आवेशमा आएर हत्या गरेको प्रारम्भिक अनुसन्धानको क्रममा हरिले स्वीकार गरेको प्रहरीले जनाएको छ ।
उनले विणालाई बलो काट्ने बहानामा लालगढ सामुदायिक वनस्थित मगर्नी खोलामा लगेर उसैले लगाएको सलले घाँटी बेरेर हत्या गरि शवलाई जंगलमै गाडेको अवस्थामा प्रहरीले ४ दिनपछि हिजो फेला पारि उत्खनन गरेर निकालेको हो ।
बैशाख १८ गते बिहीबार साँझ करिव साढे पाँच बजेको समयमा विणालाई बलो काट्न जंगल जाउँ भन्दै त्यहाँ लगेर घाँटीमा लगाएको शलले बेरेर उसको हत्या गरि शवलाई जंगलमै गाडेको चौहानले प्रहरी समक्ष बयान दिएको इलाका प्रहरी कार्यालय ढल्केबरका प्रमुख प्रहरी निरिक्षक तिर्थ कार्कीले बताए ।
उनका अनुसार हत्या गर्नुअघि नै चौहानले खाडल खनि तयार पारेर राखेको अनुसन्धानबाट खुलेको छ । ‘हत्या गर्नुअघि खाडल खनेर तयार बनाएको रहेछ’,इलाका प्रहरी कार्यालय ढल्केवरका ईन्चार्ज प्रहरी निरीक्षक तिर्थ कार्कीले भने,’विणालाई जंगलमा लगेर हत्या गरि खाडलमा गाँडेछ । घटना योजनाबद्ध तरिकाले भएको देखिन्छ ।’ पेशाले गाडी चालक रहेको चौहान बैशाख १९ गते बिहान पत्नी हराएको नाटक गर्देै प्रहरी समक्ष मौखिक जानकारी दिन पुगेका थिए ।
विगत ५ वर्षअघि विणासँग अन्तरजातिय विबाह गरेकाले बुवाआमाले घरमा बस्न नदिएपछि ससुरालीको छेउमै आफ्नो घर बनाएर बस्दै आएका उनको करिव एक वर्षदेखि आफ्नो कान्छी साली गंगा लामासँग एकतर्फी प्रेम रहेको प्रहरीले बताएको छ । सोही कारण पत्नीको मानसिक यातना सहन नसकेर उसले विणाको हत्या गरेको देखिएको प्रहरी निरीक्षक कार्कीको भनाई छ ।
हरिले योजनाबद्ध तरिकाले श्रीमतीको हत्या गरि आफ्नो साथी गोपाल श्रेष्ठलाई फोन गरि घटनाको सम्बन्धमा जानकारी दिएको प्रारम्भिक अनुसन्धानले देखाएको प्रहरी निरिक्षक कार्कीले बताए ।
खाडलमा पुरिएको शवलाई प्रहरी निरीक्षक कार्कीको नेतृत्वमा गएको प्रहरी टोलीले आईतबार साँझ उत्खनन् गरेको छ । सडेको अवस्थामा भेटिएको शवलाई पोष्टमार्टमका लागि प्रादेशिक अस्पताल जनकपुरमा पठाइएको प्रहरी निरीक्षक कार्कीले बताए ।हत्या अभियोगमा हरि चौहानलाई पक्राउ गरि जिल्ला अदालतबाट म्याद थप गरि घटनाको थप अनुसन्धान भईरहेको प्रनि कार्कीले बताए ।