इटहरीः तीजको अवसरमा विविध कार्यक्रम गर्दै आएको मोरङको सुन्दरहरैंचामा रहेको लालीगुराँस भजन कीर्तन समूहले सोमबार ममी डान्स प्रतियोगिता सम्पन्न गरेको छ ।
सो प्रतियोगितामा सुन्दरहरैंचाका विवाहित महिलाका १० समूहले प्रतिष्पर्धा गरेका थिए । प्रतियोगितामा सुन्दरहरैंचा– ९ की गीता पौडेलको समूह पहिलो भएको थियो ।
सुन्दरहरैंचा–११ की निरु बजगाईंको समूह दोस्रो भएको थियो । सुन्दरहरैंचा –११ कै कोपिला घिमिरेले तेस्रो पुरस्कार हात पारिन् । प्रतियोगिताका विजयी प्रतियोगीलाई कार्यक्रमका प्रमुख अतिथि तथा अतिथिलगायतले पुरस्कार प्रदान गरेका थिए । प्रतियोगिताको निर्णायकमा राजन लुइँटेल र निरा न्यौपाने रहेका थिए । कार्यक्रमको सञ्चालन निराजन धमला र सिर्जना आचार्यले गरेका थिए ।
सोही कार्यक्रममा सो समूहले ज्येष्ठ नागरिक महेश्वरा अधिकारी तथा अपाङ्गताको क्षेत्रमा क्रियाशील पार्वता गुरागाईँलाई सम्मान गरेको थियो । कार्यक्रमका प्रमुख अतिथि तथा सुन्दरहरैंचाको वडा नम्बर ७ का अध्यक्ष चैतन्यप्रसाद सिटौलाले दोसल्ला ओढाएर तथा नगद प्रदान गरेर सम्मान गरेका थिए ।