इटहरीः काठमांडौको कलङ्कीमा रोकी राखेको ट्रकमा अर्को ट्रक ठोक्किँदा ठक्कर दिने ट्रकमा सवार तीन जनाको मृत्यु भएको छ भने एक जना घाइते भएका छन् ।

मृत्यु हुनेमा नुवाकोटको सुन्दरादेवी घर भएका २४ वर्षीय रोशन तामाङ, नुवाकोटको तारकेश्वर घर भएका ३७ वर्षीय माधव घिमिरे र भुवेन्द्र तामाङ रहेको महानगरीय प्रहरी वृत्त कालिमाटिका प्रमुख प्रहरी नायबउपरीक्षक (डीएसपी) अपिलराज बोहराले बताए । उनका अनुसार दुर्घटनापछि गम्भीर घाइते भएका चार जनालाई उपचारार्थ स्थानीय सहिद स्मृति अस्पताल पठाइएकोमा तीन जनाको उपचारका क्रममा ज्यान गएको हो ।

दुर्घटनाका अर्का एक घाइते नुवाकोटको तारकेश्वर निवासी २२ वर्षीय विजय तामाङ उपचाररत रहेका छन् । मकालु पेट्रोल पम्पअगाडि रोेकी राखेको बा ३ ख ७५३० नम्बरको ट्रकलाई बल्खुबाट सीतापाइलातर्फ गइरहेको बा ५ ख ८८६५ नम्बरको ट्रकले ठक्कर दिँदा दुर्घटना भएको हो । दुर्घटनापछि दुवै ट्रक र चालकलाई नियन्त्रणमा लिई अनुसन्धान अघि बढाएको प्रहरीको भनाइ छ ।