इटहरीः पाँचथरको हिलिहाङ गाउँपालिका १ स्थित भित्रि सडकमा भएको ट्याक्टर दुर्घटनामा परी एक जनाको ज्यान गएको छ ।

मृत्यु हुनेमा लु ४ त २३६० नम्बरको ट्याक्टरका चालक संखुवासभा मुडे शनिश्चरे घर भएका २४ वर्षीय थलबहादुर गुरुङ रहेको जिल्ला प्रहरी कार्यालय पाँचथरले जनाएको छ । कार्यालयका अनुसार ट्याक्टर अनियन्त्रित भई सडकबाट २० मिटर तल खसेपछि चालक गुरुङ र ट्याक्टरमा सवार भोजपुरको दिङ्ला निवासी ३३ वर्षीय आकाश सुनुवार गम्भीर घाइते भएकोमा निजहरुलाई उपचारार्थ पाँचथर जिल्ला अस्पताल पठाइएको थियो । चालक गुरुङको उपचारका क्रममा ज्यान गएको र अर्का घाइते सुनुवारको उपचार जारी रहेको प्रहरीको भनाइ छ ।