इटहरीः मोरङको विराटनगर महानगरपालिका १३ स्थित कोसी प्रोजेक्टअगाडि भित्रि सडकखण्डमा आज दिउँसो ३ः५० बजे भएको सवारी दुर्घटनमा परी एक जनाको मृत्यु भएको छ ।

मृत्यु हुनेमा मोरङको विराटनगर महानगरपालिका १५ बस्ने अन्दाजी ६५ वर्षीय रतन साह रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । साइकलमा सवार रहेका साहलाई दक्षिणबाट उत्तरतर्फ गइरहेको को ३९ प ९९९३ नम्बरको मोटरसाइकलले ठक्कर दिएपछि गम्भीर घाइते भएका साहलाई प्रहरीले उपचारार्थ कोसी अस्पताल पठाएकोमा उपचारका क्रममा दिउँसो ४ः३० उपचारका क्रममा उनको ज्यान गएको प्रहरीको भनाइ छ ।

दुर्घटना गराउने मोटरसाइकलका चालक विराटनगर १५ घर भएका २९ वर्षीय देवीप्रसाद अधिकारीलाई जिल्ला प्रहरी कार्यालय मोरङले नियन्त्रणमा लिई अनुसन्धान अगाडि बढाएको छ । उनले चलाएको मोटरसाइकल जिल्ला ट्राफिक प्रहरी कार्यालय मोरङको नियन्त्रणमा रहेको छ ।