इटहरीः मोरङको विराटनगर महानगरपालिका १३ अन्तर्गत कोसी राजमार्गमा हिजो अपराहन्न ४ः१० बजे भएको सवारी दुर्घटनामा परी एक जनाको ज्यान गएको छ ।

मृत्यु हुनेमा राजविराज नगरपालिका घर भई हाल विराटनगर महानगरपालिका १३ बस्ने ६१ वर्षीया शान्तिदेवी देव रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । उत्तरबाट दक्षिणतर्फ गइरहेको प्रदेश १ ०२ ०४२ प ९६४२ नम्बरको मोटरसाइकलले पैदलयात्री देवलाई ठक्कर दिएपछि उनी घाइते भएकी थिइन् । घाइते देवलाई उपचारार्थ विराटनगरकै नोबेल मेडिकल कलेज शिक्षण अस्पताल पठाइएकोमा उनको उपचारका क्रममा साँझ ७ः४५ बजे ज्यान गएको हो ।

दुर्घटना गराउने मोटरसाइकल र चालक मोरङको कटहरी गाउँपालिका १ बस्ने ३० वर्षीय वीरबहादुर राईलाई विराटनगरस्थित वडा प्रहरी कार्यालय क ले नियन्त्रणमा लिई घटनाको अनुसन्धान अगाडि बढाएको प्रहरीले जनाएको छ ।