इटहरीः खोटाङमा आज ट्याक्टर दुर्घटना हुँदा एक जनाका घटनास्थलमै मृत्यु भएको छ । ट्याक्टरका चालक भने गम्भीर घाइते भएका छन् ।
सप्तरीको फत्तेपुरबाट धान लिएर खोटेहाङ गाउँपालिका–६ इन्द्रेणीपोखरी जाँदै गरेको सु–प–प्र–०१–००२ त ४२९८ नम्बरको ट्याक्टर दुर्घटना हुँदा उदयपुरको लिम्चुङबुङ गाउँपालिका–४ बलम्ता घर भएका ट्याक्टरका सहचालक १८ वर्षीय किरण राईको मृत्यु भएको हो । यस्तै, दुर्घटनामा सोही ठाउँका ट्याक्टर चालक १९ वर्षीय तुजन राई गम्भीर घाइते भएका ईन्द्रेणीपोखरीका वडाध्यक्ष देवेन्द्र राईले जानकारी दिएका छन् । सिम्पानी–रोक्सिमभञ्ज्याङ सडकखण्ड अन्तर्गत इन्द्रेणीपोखरीको मेर्लामा अनियन्त्रित भएको ट्याक्टर सडकबाट पल्टिएर करिब तीन मिटर तल खसेको राईले जानकारी दिए ।
दुर्घटनालगत्तै घटनास्थलमा इलाका प्रहरी कार्यालय खोटाङबजार र प्रहरी चौकी सिम्पानीबाट प्रहरी पुगेका छन् । घाइतेलाई कम्मरमुनिको भाग नचल्ने अवस्थामा उद्दार गरिएको जिल्ला प्रहरी कार्यालय खोटाङले जनाएको छ । रोक्सिमभञ्ज्याङ पुग्नुभन्दा करिब आधा घण्टाअगाडि ट्याक्टर दुर्घटनामा परेको स्थानीय बासिन्दाले जनाएका छन् । मृतकको शव परीक्षणका लागि उदयपुर पठाउने तयारी गरिएको प्रहरीले जनाएको छ ।
_1720278409.jpg)
