इटहरीः मोरङको पथरिशनिश्चरे नगरपालिका २ हरियाली वनस्थित पूर्व पश्चिम लोकमार्गमा आज दिउँसो ३ः३० बजे भएको सवारी दुर्घटनामा परी एक जनाको मृत्यु भएको छ भने एक जना घाइते भएका छन् ।

पूर्वबाट पश्चिमतर्फ आइरहेको को १ च ९९५४ नम्बरको स्कर्पियोले विपरीत दिशाबाट आइरहेको नम्बर नखुलेको मोटरसाइकललाई ठक्कर दिँदा मोटरसाइकलमा सवार अन्दाजी २५ वर्षीय युवकको घटनास्थलमै मृत्यु भएको १ नम्बर प्रदेश ट्राफिक प्रहरी कार्यालय इटहरीले जनाएको छ ।

दुर्घटनामा परी मोटरसाइकलको पछाडि सवार अन्दाजी २५ वर्षीय पुरुष गम्भीर घाइते भएकोमा उनलाई उपचारार्थ विराटनगरस्थित न्युरो अस्पताल पठाइएको प्रहरीको भनाइ छ । मृतक तथा घाइतेमध्ये कसैको पनि परिचय खुल्न नसकेको प्रहरीले जनाएको छ ।

दुर्घटनामा परेको मोटरसाइकलमा आगलागी भई पूर्ण रुपमा जलेर नष्ट भएको छ भने दुर्घटना गराउने स्कर्पियोका चालक झापाको दमक नगरपालिका २ घर भएका ३७ वर्षीय लक्ष्मीकुमार धिमाललाई इलाका प्रहरी कार्यालय पथरीले स्कर्पियोसहित नियन्त्रणमा लिई अनुसन्धान सुरु गरेको प्रहरीले जनाएको छ ।