इटहरीः मोरङको उर्लाबारी नगरपालिका ४ स्थित उर्लाबारी नगरपालिका कार्यालयअगाडि हिजो साँझ भएको सवारी दुर्घटनामा परी एक जनाको ज्यान गएको छ ।

मृत्यु हुनेमा झापाको दमक नगरपालिका–४ का ३२ वर्षीय प्रदीप कार्की रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । मे ६ प ३२६३ नम्बरको मोटरसाइकलमा सवार भई पूर्व पश्चिम राजमार्गमा पूर्वबाट पश्चिमतर्फ आइरहेका कार्कीलाई विपरीत दिशातर्फ गइरहेको को १ ख ६२७८ नम्बरको यात्रुवाहक बसले ठक्कर दिएको हो । दुर्घटनामा परी गम्भीर घाइते भएका कार्कीलाई उपचारार्थ उर्लाबारीस्थित अरनिको अस्पताल लगिएकोमा उपचारका क्रममा साँझ ५ बजे कार्कीको ज्यान गएको इलाका प्रहरी कार्यालय उर्लाबारीका प्रमुख प्रहरी निरीक्षक उद्धव पोख्रेलले जानकारी दिए ।

उनका अनुसार मोटरसाइकलको पछाडि सवार झापाको दमक–४ का २७ वर्षीय उत्तम कटुवाललाई गम्भीर अवस्थामा उपचारार्थ अरनिको अस्पताल पठाइएकोमा त्यहाँ उपचार सम्भव नभएपछि झापाको बिर्तामोडस्थित बी एण्ड सी अस्पतालमा उनको उपचार जारी रहेको छ । दुर्घटना गराउने बसका चालक सुनसरीको धरान उपमहानगरपालिका–८ का ४७ वर्षीय पुलकित राजधामीलाई बससहित नियन्त्रणमा लिई घटनाको अनुसन्धान सुरु गरेको प्रहरीको भनाइ छ ।