इटहरीः मोरङको विराटनगरस्थित मेरिल्याण्ड कलेजको बस आज बिहान दुर्घटना हुँदा पाँच जना विद्यार्थी घाइते भएका छन् ।

डाइनियाँबाट विराटनगरतर्फ गइरहेको बा २ ख ४५८ नम्बरको विद्यार्थी बोकेको बस सुनवर्षी नगरपालिका – ९ स्थित भेडुवाथानमा दुर्घटनामा परेको इलाका प्रहरी कार्यालय रंगेलीका प्रहरी निरीक्षक अनमोल खड्काले बताए । उनका अनुसार दुर्घटनामा परी रतुवामाई नगरपालिका– ३ की १७ वर्षीया रेजिना घिमिरे, १६ वर्षीया श्रद्धा भट्टराई, मनिषा राजवंशी, निशा ताजपुरीया र विशालकुमार मण्डल गरी पाँच विद्यार्थी घाइते भएका हुन् । घाइते सबैलाई उपचारार्थ विराटनगर पुर्याइएको प्रहरीको भनाइ छ ।

उनीहरुको अवस्था सामान्य रहेको छ । बाक्लो हुस्सुका कारण भिजिविलिटी कम हुँदा चालकलाई देख्न गाह्रो भई दुर्घटना भएको हो । दुर्घटनापछि प्रहरीले बसका चालक रतुवामाई नगरपालिका – ६ का ३१ वर्षीय धर्मेन्द्र बर्मालाई नियन्त्रणमा लिएको छ । घटनाको विस्तृत अनुसन्धान सुरु गरिएको प्रहरीको भनाइ छ ।