इटहरीः आफ्नै छिमेकीलाई छुरा प्रहार गरी फरार रहेका एक युवकलाई प्रहरीले पक्राउ गरेको छ ।

पक्राउ पर्नेमा मोरङको बेलबारी नगरपालिका–२ का २२ वर्षीय अनिल उराउ रहेको जिल्ला प्रहरी कार्यालय मोरङका प्रवक्ता प्रहरी नायबउपरीक्षक (डीएसपी) मानबहादुर राईले बताए । उनका अनुसार हिजो राति आफ्ना छिमेकी २४ वर्षीय दिनेश दाहाललाई छुरा प्रहार गरी फरार रहेका अभियुक्त उराउलाई प्रहरीले मोरङकै खोर्सानेबाट नियन्त्रणमा लिएको हो । हाल इलाका प्रहरी कार्यालय बेलबारीको हिरासतमा रहेका अभियुक्त उराउमाथि ज्यान मार्ने उद्योगअन्तर्गत कारबाही चलाइने इलाका प्रहरी कार्यालय बेलबारीका प्रमुख प्रहरी निरीक्षक ऋषिराज ढकालले बताए ।

छुरा प्रहारबाट गम्भीर घाइते भएका युवक दाहालको विराटनगरस्थित विराटनगर अस्पतालमा उपचार भइरहेको प्रहरीले जनाएको छ । उनको अवस्था गम्भीर रहेकाले तत्काल शल्यकृया गर्नुपर्ने चिकित्सकको भनाइ छ ।