सुन पाउने आशामा विराटनगरको माझी परिवारले छोरी गुमायो

  • माघ २७, २०७७
  • ५१६० पटक पढिएको
  • शंकर खत्री
alt

इटहरीः मोरङको विराटनगर महानगरपालिका वडा नम्बर ४ इक्राहीकी गुजेश्वरी माझी गत माघ १० गतेदेखि बेपत्ता भएकी छन् । परिवारले सुन पाउने आशामा छोरी नै गुमाएका हुन् । गुजेश्वरीकी आमा दुखनसरी माझीले आफ्नो घरमा एक व्यक्तिले आएर सुनको भण्डार रहेको भन्दै प्रलोभन देखाएको र उसले भनेको मान्दै जाँदा आज छोरी नै गुमाउनु परेको बताइन् । उनले प्रजनन क्षमता कम भएका महिलाहरुलाई प्रजनन गर्न सक्षम बनाउने औषधि बेच्ने बहानाले आएका विराटनगरकै १९ नम्बर वडामा बस्ने दिनेश मण्डलले आफ्नी छोरी लगेको बताइन् । मण्डलले कन्या कुमारीको साथमा सात खोलामा पूजा गर्दा घरमा अधिक सुन भेटिने भन्दै गुजेश्वरीलाई लगेका थिए । त्योभन्दा पहिले मण्डलले झारफूक गरेर गुजेश्वरीको घरबाट गाडिएको अवस्थामा एउटा सुनको औँठी भेटाइदिएका थिए । यसले गुजेश्वरीको परिवारमा मण्डलप्रति विश्वास बढ्दै गएको थियो ।

‘पुष २४÷२५ गतेतिर त्यो मान्छे हाम्रो गाउँमा आयो । र, मलाई सोध्यो कि एउटा मान्छेको घर कहाँ हो । मैले किन भनेर उसलाई सोधेँ । उसले त्यसको छोराछोरी भएको छैन र अनि त्यही हुने औषधि दिन आएको भनेर मलाई भन्यो । मैले पनि हाम्रा गाउँमा सुनिता र अरुको पनि बच्चा भएको छैन, उनीहरुलाई पनि दिँदा हुन्छ भने हेरौँ न त कस्तो हुँदो रहेछ भनेर औषधि दिन भने । त्यसले सुनितालाई पनि औषधि दियो’, उनले भनिन् । यसरी नजिकिएको दिनेश मण्डलको त्यो घरमा आउजाउ बाक्लिन थाल्यो । त्यसपछि दिन बिराएर उ माझी परिवारको घरमा आउने गरेको थियो । ‘त्यसपछि उ एक दिन छुटाएर मेरो घरमा आउँथ्यो । एक दिन त्यसले मलाई तपाईँको घरमा जिन छ त्यसलाई निकाल्यो भन्ने धेरै सुन भेटिन्छ भनेर भन्यो । मैले पनि सुन पाउने आशामा उसले भनेको सबै मानेँ । एक दिन उसले हाम्रो घरमा पूजा गर्यो र एउटा गणेश भगवानको औँठी गाडिएको ठाउँबाट निकालिदियो । हामीलाई विश्वास झन् बढ्यो । त्यसपछि उसले हामीलाई तपाईँकोमा अझै सुन भेटिन्छ त्यसको लागि ५० हजार रुपैयाँ चाहिन्छ भन्यो । मैले सुन नै पाइन्छ भने ५० हजार दिउँ भनेर सुन राख्ने विचार गरेँ । माघ १० गते शनिबारको दिन हामीले विराटनगरमा रहेको एक सुन पसलमा गहना राखेर पैसा निकालेर उसलाई दियाँै । करिब १२ बजेतिर हामी पसल गएका थियौँ । अनि राति उसले जिन निकाल्न कन्या कुमारीसँगै सात खोलाको पानी ल्याएर पूजा गर्नुपर्छ भन्यो । अरु कोही थिएन, मैले मेरी छोरी नै उसँग पठाइदिएँ । यो रातिको कुरा हो । त्यसपछि हाम्री गुजी आएकै छैन । कति खोजिसक्यौँ अहिलेसम्म फेला पारेका छैनौँ’, उनले गहभरि आँसु पार्दै भनिन् । 

आफ्नो परिवार रुढिवादी सोचको भएकै कारण बहिनी गुमाउनु परेको गुजेश्वरीका दाजु ध्रुवनारायण माझीले बताए । आफ्नी बहिनीजस्तै मण्डलले धेरैलाई विभिन्न प्रलोभनमा फसाएर भारत लग्ने गरेको हुनसक्ने ध्रुवनारायणको आशंका छ । ‘म व्यापार गर्न इटहरी बस्छु । बेला मौकामा मात्र घर जाने गर्छु । त्यो मान्छे घर गएर आमालाई आशा देखाएपछि मलाई फोन गरेर इटहरी आउनुभयो । मलाई त्यो सबै भन्नुभयो । मलाई त्यो ठग हो भन्ने लागिसकेको थियो । मैले आमा र त्यो दिनेश मण्डललाई गाली गरेर पठाएँ । त्यसपछि म मेरो काममा व्यस्त भएँ । रुढिवादी सोच भएको मेरो परिवारका सदस्यले मलाई थाहा नै नदिई यो सबै गर्नुभएछ । अहिले मेरी बहिनी हराएकी छन्’, उनले भने । बहिनी १० गते राति हराएपनि आफू र गाउँलेले ११ गते मात्र थाहा पाएको उनले बताए । ‘१० गते पूजा गर्ने भन्दै लगेको मण्डलले हाम्रो बहिनी ल्याएनछ । तर यो सबै मलाई ११ गते मात्र थाहा भयो । म घर आएको बेला बहिनीलाई देखिनँ र आमा पनि निराश हुनुहुन्थ्यो । आमालाई सोध्दा एकछिन त केही बोल्नुभएन तर पछि सबै भन्नुभयो’, उनले भने । उनले आफ्नी बहिनी फेला नपरे पनि अन्य नेपाली बहिनीहरुलाई यस्तो नहोस् भन्नकै लागि आफूले मण्डललाई कारबाही गर्न जिल्ला प्रहरी कार्यालय मोरङमा जाहेरी दिएको बताए । तर प्रहरीले घटनाका विषयमा छानबिनमा ढिलासुस्ति गरेको उनको भनाइ छ ।

मण्डलले इक्राहीका तीन÷चार जना महिलाहरुलाई बच्चा हुने औषधि दिएका थिए । तर, उनले औषधि दिएकामध्ये कसैको पनि अहिलेसम्म बच्चा भएको छैन । बच्चा हुने आशाले गुजेश्वरीकी छिमेकी इक्राहीकै सुनिता उराउले पनि मण्डलसँग एक हजार रुपैयाँ तिरेर औषधि लिएकी थिइन् । अहिले मण्डल पनि भागेको र आफूलाई औषधिले पनि काम नगरेको उराउ बताउँछिन् । ‘ दुखनसरी दिदीले मलाई बच्चा हुने औषधि लिएर एउटा मान्छे आएको छ भनेर भन्नुभयो । मेरो पनि बच्चा थिएन एक पटक खाएर हेरौँ न त भनेर औषधि किन्ने विचार गरेँ । उसले २५ सय लाग्छ भन्यो । मैले एक हजारमा दिन भने र एक हजार चाहीँ बच्चा भयो भने दिन्छु भने । उसले मलाई औषधि दियो । न मेरो बच्चा भयो । अहिले उ कता गयो थाहा नै छैन’, उनले भनिन् । अर्की एक स्थानीय भगवति साहलाई मण्डलले पत्थरीको समस्या अस्पताल नगई आफै निको पार्दिने दाबी गरेका थिए । त्यति मात्र होइन, मण्डलले साहलाई औषधि खाएको १६ दिनमा अस्पताल गएर चेक गर्न र पत्थरी निको नभए आफूलाई जस्तोसुकै सजाय दिन भनेका थिए ।

‘२४÷२५ गतेतिर त्यो मान्छे दुखनसरी माइजुको घरमा आएको रहेछ । माइजुले मलाई बुहारी, यहाँ एउटा मान्छे आएको छ पत्थरी निको पार्छ रे भन्नुभयो । मलाई पनि पत्थरी थियो । मैले त गोल्डेन हस्पिटलमा अपरेसन गर्ने पनि तयारी गरिसकेको थिएँ । उसले अपरेसन गर्नु पर्दैन । एउटा औषधी १३÷१४ दिनसम्म खानू । १६÷१७ दिनमा अस्पताल जानू र हेर्नू । निको भएन भने मलाई त्यहिँ पिट्नू । तर निको भयो भने तपाईँ मलाई पैसा दिनू भनेर उसले मलाइ भन्यो । उसले मलाई औषधी दिँदा २४ सय रुपैयाँ लग्यो । ६÷७ दिनसम्म औषधि खाँदा मलाई आरम भएजस्तो भयो । तर, त्यसपछि त्यो मान्छे नै गायब भयो । गुजेश्वरी बहिनीलाई पनि गायब बनायो’, उनले भनिन् । 

गुजेश्वरीजस्तै प्रदेश १ मा गत वैशाखदेखि पौष महिनसम्म १७ सय ६४ जना महिला तथा बालबालिका हराएको प्रदेश १ प्रहरी कार्यालय विराटनगरको तथ्याङ्गमा उल्लेख छ । त्यसमध्ये मोरङका मात्रै तीन सय ३२ जना महिला तथा बालबालिका रहेका छन् । यस्तै सुनसरीमा दुई सय ९७ जना र झापामा चार सय छ जना महिला तथा बालबालिका बेपत्ता भएको उजुरी परेको १ नम्बर प्रदेश प्रहरीले जानकारी दिएको छ ।

polic report aama mudda

 

प्रतिक्रिया दिनुहोस

पोखरामा आन्तरिक पर्यटकको आवागमनमा वृद्धि

पोखराः आन्तरिक तथा बाह्य पर्यटकको गन्तव्य पोखरामा पर्यटकको चहलपहल बढेको छ । कोरोना भाइरसका कारण लाम ...

जङ्गलमा सडेको अवस्थामा महिलाको शव फेला

सिरहाः सिरहाको सामुदायिक वन क्षेत्रमा सडेको अवस्थामा महिलाको शव फेला परेको छ । मिर्चैया नगरपालिका&n ...

‘एक साँझ शिवका माझ’

झापाः पूर्वको पशुपतिनाथ भनेर चिनिने ‘अर्जुनधारा जलेश्वरधाम’मा यस वर्षको महाशिवरात्रि पर् ...

इष्ट टुरिजम इभेन्ट म्यानेजमेन्ट एण्ड मिडिया प्रालिद्धारा प्रकाशित

प्रदेश पोर्टल डटकम

इटहरी उपमहानगरपालिका, सुनसरी, कोशी, नेपाल

  • कम्पनी दर्ता नं. १९४७९७/०७५/०७६
  • स्थायी लेखा नं. ६०६६४३६५८
  • सूचना विभाग दर्ता नं. ९३०/०७५–०७६
  • प्रेस काउन्सिल दर्ता नं. १७१/०७५–०७६
  • फोन नं.: +९७७ २५ ५८२६९०
  • मोबाइल नं.: +९७७ ९८४२०३७४०२
  • इमेल: [email protected]
  • प्रधान सम्पादक: राजेश विद्रोही
  • प्रबन्धकः देवान किराती
  • प्रबन्ध सम्पादकः प्रेमप्रसाद बास्तोला
  • अंग्रेजी डेस्क प्रमुखः विराट अनुपम
  • फाेटाे पत्रकारः गुरू ढकाल, वुलेट खतिवडा
  • मार्केटिङ प्रमुखः देवराज पुरी
  •   ९८६२३०११३८, ९८१९०३१०६२
  • संवाददाताः कविराज घिमिरे (धनकुटा)
  •   नमिन ढकाल (इलाम)
  •  राजन ठटाल (खोटागं)
  •   बाबुराम वास्ताेला (संखुवासभा)
  • स्वास्थ्य पृष्ठ संयोजकःडा. सुर्यबहादुर पराजुली (एमडी)
  • लोकसेवा पृष्ठ संयोजकः अनिल पोख्रेल (नायब सुब्बा)

Copyright © 2018 / 2021 - pradeshportal.com All rights reserved