इटहरीः हत्या अभियोग लागेका एक जना फरार अभियुक्तलाई प्रहरीले हिजो साँझ पक्राउ गरेको छ ।

पक्राउ पर्नेमा मोरङको ग्रामथान गाउँपालिका –४, मोतीपुरका ३८ वर्षीय ओमनारायण धामी रहेको जिल्ला प्रहरी कार्यालय मोरङका प्रमुख प्रहरी उपरीक्षक (एसपी) सन्तोष खड्काले बताए । उनका अनुसार अभियुक्त धामी बुढीगंगा गाउँपालिका–२ स्थित बाइपास रोडबाट पक्राउ परेका हुन् । अभियुक्त धामीमाथि गत भदौ १२ गते मोरङको बेलबारी–५ कसेनीका चन्द्रकुमार राईको हत्या गरेको अभियोग आरोप छ । घटनाका आरोपीहरुमा स्थानीय जितेन चौधरी, दिनेश श्रेष्ठ र सन्तोष मगरसमेत रहेको एसपी खड्काले बताए ।

अभियुक्तहरुद्वारा धारिलो हतियार प्रहार गरी गम्भीर घाइते बनाइएका सईकुमार राई, समुन्द्र राई र गौरव राईका साथै चन्द्रकुमार राईलाई उपचारार्थ बुढीगंगा गाउँपालिकास्थित विराट मेडिकल कलेज लगिएकोमा चन्द्रकुमारको उपचारका क्रममा ज्यान गएको थियो ।