इटहरीः सिन्धुलीको कमलामाई नगरपालिका ७ स्थित करङडाँडामा भएको जीप दुर्घटनामा परी चार जनाको घटनास्थलमै मृत्यु भएको छ ।

ज्यान गुमाउनेहरुमा कमलामाई नगरपालिका बाँसकोटका ६०–६५ वर्षका रुद्रबहादुर थापा, १८ वर्षकी रीता इस्माली, १९ वर्षकी दुर्गा श्रेष्ठ र उनका छोरा २ वर्षका मनीष श्रेष्ठ रहेको जिल्ला प्रहरी कार्यालय सिन्धुलीले जनाएको छ । दुर्घटनामा परी जीपका चालकसहित सात जना घाइते भएको प्रहरीको भनाइ छ । घाइतेहरुलाई उपचारार्थ सिन्धुली जिल्ला अस्पताल लगिएको र गम्भीर अवस्थामा रहेका चालक भोजविक्रम थापालाई धुलिखेल पठाइएको प्रहरीले जानकारी दिएको छ ।

सिन्धुली सदरमुकाम सिन्धुलीमाडीबाट बाँसकोटतर्फ गइरहेका बा १७ च १११७ नम्बरको जीप दिउँसो ३ः४५ बजे अनियन्त्रित भई सडकबाट ५० मिटर तल खसेको थियो । दुर्घटनाबारे विस्तृत अनुसन्धान जारी रहेको प्रहरीले जनाएको छ ।