इटहरीः मोरङको कटहरी गाउँपालिका ३ स्थित भित्री सडकखण्डमा गएराति भएको सवारी दुर्घटनामा परी एक जनाको ज्यान गएको छ ।

मृत्यु हुनेमा कटहरी २ घर भएका ३७ वर्षीय बच्चु मल्लिक रहेको जिल्ला प्रहरी कार्यालय मोरङका प्रवक्ता प्रहरी नायबउपरीक्षक (डीएसपी) मानबहादुर राईले बताए । उनका अनुसार साइकलमा सवार भई पूर्वबाट पश्चिमतर्फ गइरहेका मल्लिकलाई को १ ख ४७८३ नम्बरको टिपरले ठक्कर दिँदा उनी गम्भीर घाइते भएका थिए । उनलाई उपचारार्थ विराटनगरस्थित कोसी अस्पताल पठाइएकोमा अस्पताल पुग्नासाथ उनको ज्यान गएको डीएसपी राईको भनाइ छ ।

दुर्घटना गराउने टिपरका चालक सुनसरीको इटहरी उपमहानगरपालिका १४ का २८ वर्षीय मुकेश चौधरीलाई नियन्त्रणमा लिई अनुसन्धान सुरु गरिएको प्रहरीले जनाएको छ । आक्रोशित स्थानीयवासीले टिपरमा तोडफोडसमेत गरेको बताउँदै डीएसपी राईले चालकलाई भने प्रहरीले सुरक्षा दिई आक्रमणमा पर्नबाट जोगाएको जानकारी दिए ।