इटहरीः झापाको बुद्धशान्ति गाउँपालिका ४ बर्नेबाट प्रहरीले ठूलो परिमाणको भारतीय ब्राण्डेड रक्सीसहित एक जनालाई गएराति पक्राउ गरेको छ ।

पक्राउ पर्नेमा मे १ ज ३३५१ नम्बरको गाडीका चालक इलामको सूर्योदय नगरपालिका २ का २८ वर्षीय प्रकाश खड्का रहेको जिल्ला प्रहरी कार्यालय झापाका प्रवक्ता प्रहरी नायबउपरीक्षक (डीएसपी) राकेश थापाले बताए । उनका अनुसार पक्राउ परेका अभियुक्त खड्काका साथबाट इलाका प्रहरी कार्यालय बुधबारेको टोलीले सिक्किम गोल्डेन ८४ बोतल र फायरबल रक्सी ११ बोतल गरी जम्मा ९५ बोतल रक्सी बरामद गरेको छ ।

अभियुक्त खड्कालाई बरामद गरिएका रक्सी र निजले प्रयोग गरेको भ्यानसहित आवश्यक कारबाहीका लागि आन्तरिक राजश्व कार्यालय चन्द्रगढी पठाइएको बताउँदै डीएसपी थापाले यसअघि नै प्रहरीले बरामद गरेका दुई सय ११ बोतल सिक्किम गोल्डेन ब्राण्डको भारतीय रक्सीसमेत राजश्व कार्यालयलाई बुझाइएको जानकारी दिए । भारतीय ब्राण्डका रक्सीहरु अवैध रुपमा इलामका पशुपतिनगर, छब्बीसेलगायत झापाका विभिन्न सीमावर्ति क्षेत्रबाट नेपाली बजारमा भित्रने गरेको प्रहरीले जनाएको छ ।