इटहरीः झापाको शिवसताक्षी नगरपालिका १ स्थित भित्री सडकखण्डमा पर्ने ढुङ्गेल चौकमा गएराति मोटरसाइकल दुर्घटना हुँदा एक जनाको ज्यान गएको छ ।

मृत्यु हुनेमा शिवसताक्षी १ बस्ने ४६ वर्षीय किशोर कार्की रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । मे १० प ५३६९ नम्बरको मोटरसाइकलमा सवार भई उत्तरबाट दक्षिणतर्फ गइरहेका कार्की राति ८ बजे दुर्घटनामा परेका थिए । तिव्र गतिका कारण मोटरसाइकल अनियन्त्रित भई दुर्घटना भएकोमा गम्भीर घाइते भएका कार्कीलाई उपचारार्थ बिर्तामोडस्थित बी एन्ड सी अस्पताल लगिएको थियो ।

उपचारका क्रममा उनको बिहान करिब २ बजे ज्यान गएको प्रहरीले जनाएको छ । घटनाको विस्तृत अनुसन्धानका लागि मोटरसाइकल नियन्त्रणमा लिएको प्रहरीको भनाइ छ ।