इटहरीः मोरङको मिक्लाजुङ गाउँपालिका ६ थामीझोडामा हात्तीको आक्रामणबाट गएराति एक जनाको ज्यान गएको छ ।
ज्यान गुमाउनेमा स्थानीय ४९ वर्षीय यामबहादुर बोहरा रहेको इलाका प्रहरी कार्यालय उर्लाबारीका प्रमुख प्रहरी निरीक्षक कुन्दन देवले जानकारी दिए । उनका अनुसार राति १० बजे हात्तीको आक्रमणमा परेका बोहरालाई उपचारार्थ अस्पतालतर्फ लैजाने क्रममा ११ बजे बाटैमा उनको ज्यान गएको हो । आफ्नी श्रीमती सावित्रासँग छिमेकी मनबहादुर मगरको घरमा फिल्म हेरेर फर्कने क्रममा हात्तीको आक्रमणमा परी ज्यान गुमाएका बोहराको शव पोस्टमार्टमका लागि उर्लाबारीस्थित मंगलबारे अस्पताल पठाई अनुसन्धान सुरु गरिएको प्रहरीको भनाइ छ ।
मृतक र उनकी श्रीमती दुवै जना बोल्न र सुन्न नसक्ने अपाङ्गताबाट पीडित रहेको प्रहरीको भनाइ छ । घटनास्थलमा एउटा मात्र हात्ती देखिएको स्थानीयले बताइरहँदा प्रहरीले भने चार ओटा हात्ती देखिएको उल्लेख गरेको छ । हात्तीले यसअघि पनि सो गाउँमा भौतिक क्षति पुर्याउँदै आएकोमा अहिले भने मानवीय क्षति हुन पुगेको स्थानीयको भनाइ छ ।
_1720278409.jpg)
