इटहरीः झापाको मेचिनगर नगरपालिका ६ स्थित बसपार्क क्षेत्रबाट प्रहरीले एक जनालाई प्रतिबन्धित लागूऔषधसहित पक्राउ गरेको छ ।

पक्राउ पर्नेमा जिल्लाको दमक नगरपालिका ५ घर भएका १८ वर्षीय अनुप धिताल रहेको १ नम्बर प्रदेश प्रहरी कार्यालय विराटनगरले जनाएको छ । कार्यालयका अनुसार आइतबार राति ८ बजे इलाका प्रहरी कार्यालय काकडभिट्टाको टोलीद्वारा पक्राउ परेका अभियुक्त धितालका साथबाट प्रहरीले प्रतिबन्धित लागूऔषध फेनरागन ३६ एम्पुल, लुपिजेसिक ३५ र डाईजेपाम ३३ एम्पुल बरामद गरेको छ ।

अभियुक्त धिताललाई इलाका प्रहरी कार्यालय काकडभिट्टाको हिरासतमा राखी लागूऔषध नियन्त्रण ऐन २०३३ अन्तर्गत कारबाहीका लागि जिल्ला अदालत झापाको आदेशमा म्याद थप गरी अनुसन्धान भइरहेको प्रहरीले जनाएको छ ।