इटहरीः सुनसरीको इटहरी उपमहानगरपालिकास्थित कोसी राजमार्गको इटहरी खण्डअन्तर्गत आदर्श मार्गको गेटछेउमा आज दिउँसो २ः३५ बजे टिपरको ठक्करबाट एक जनाको ज्यान गएको छ ।
मृत्यु हुनेमा इटहरी १ बस्ने ७२ वर्षीय कर्णबहादुर गुरुङ रहेको १ नम्बर प्रदेश ट्राफिक प्रहरी कार्यालय इटहरीले जनाएको छ । कार्यालयका प्रवक्ता प्रहरी नायबउपरीक्षक (डीएसपी) सुमन तिम्सिनाका अनुसार इटहरीबाट धरानतर्फ गइरहेको प्रदेश १ ०२ ००१ ख ८६६५ नम्बरको टिपरले ठक्कर दिनासाथ गुरुङको घटनास्थलमै ज्यान गएको हो ।
दुर्घटना गराउने टिपर र त्यसका चालक इटहरी १९ बस्ने २९ वर्षीय अनिल चौधरीलाई नियन्त्रणमा लिई घटनाको अनुसन्धान सुरु गरिएको प्रवक्ता तिम्सिनाको भनाइ छ । घटनास्थलमा प्रहरीको टोली परिचालित रहेको बताउँदै उनले सडकको अवस्थाका कारण दुर्घटना भएको प्रहरीको प्रारम्भिक अनुसन्धानबाट देखिएको जानकारी दिए ।
_1720278409.jpg)
