इटहरीः मोरङको विराटनगर महानगरपालिका ७ स्थित धाडेवा रोडमा रहेको एक हार्डवेयरको गोदामबाट कटुवा पेस्तोल र त्यसमा लाग्ने एक राउन्ड गोलीसहित एक जना पक्राउ परेका छन् ।

पक्राउ पर्नेमा सुनसरीको इटहरी उपमहानगरपालिका १७ घर भई विराटनगरका व्यवसायी राजकुमार रौनियारद्वारा सञ्चालित हार्डवेयरमा कार्यरत २४ वर्षीय सुजितकुमार साह रहेको जिल्ला प्रहरी कार्यालय मोरङले जनाएको छ । कार्यालयका प्रमुख प्रहरी उपरीक्षक (एसपी) सन्तोष खड्काका अनुसार राजश्व छलीको आशंकामा रौनियारको गोदाममा छापामारी गर्न पुगेको राजश्व अनुसन्धान कार्यालय इटहरीको टोलीद्वारा साह हतियारसहित पक्राउ परेका हुन् ।

बरामद गरिएको हतियार आफूले नै राखेको भन्दै अभियुक्त साहले आफूमाथि लागेको आरोप स्वीकार गरेको एसपी खड्काले जानकारी दिए । अभियुक्त साहलाई जिल्ला अदालत मोरङको आदेश अनुसार अनुसन्धानका लागि हिरासतमा राखिएको बताउँदै उनीमाथि कानून अनुसार कारबाही अगाडि बढाइने प्रष्ट पारे ।