इटहरीः सुनसरी र मोरङका छुट्टाछुट्टै स्थानमा भएका सवारी दुर्घटनामा परी २ जनाको मृत्यु भएको छ ।

सोमबार बेलुका ३ बजे सुनसरीको इटहरी २० पानीपियास्थित कोसी राजमार्गमा धरान आउदै गरेको ना ५ ख ५८२३ नम्बरको ट्रकले सोही दिशातर्फ जाँदै गरेको प्रदेश १–०२–०४० प ५८२७ नम्बरको मोटरसाइकललाई ठक्कर दिँदा गम्भीर घाइते भएका मोटरसाइकल चालक धनकुटा आले –४ का २० बर्षीय राकेश राईको घोपा धरानमा उपचारको क्रममा बेलुका पौने ५ बजे मृत्यु भएको इलाका प्रहरी कार्यालय धरानले जनाएको छ ।

ट्रक प्रहरीको नियन्त्रणमा रहेको र चालक मोरङजा २८ वर्षीय कृष्णकुमार माझी तत्काल फरार रहेकोले खोजतलास भइरहेको सो कार्यालयले जनाएको छ । त्यस्तै सोमबार साँझ साढे ६ बजे मोरङ पथरी शनिश्चरे ७ स्थित उत्तरतर्फ आउँदै गरेको मे १ त ४१६२ नम्बरको ट्याक्टर आफैँ अनियन्त्रित भई दुर्घटना हुँदा ट्याक्टर चालक कानेपोखरी ५ चिसाङ का २१ वर्षीय विनोद अधिकारी गम्भीर घाइते भएका थिए । उनको नोबेल शिक्षण अस्पताल विराटनगरमा उपचारको क्रममा बेलुका साढे ८ बजे मृत्यु भएको इलाका प्रहरी कार्यालय बेलबारीले जनाएको छ ।