इटहरीः झापाको मेचीनगर नगरपालिका–६ बाट प्रतिबन्धित लागूऔषध ब्राउनसुगरसहित १ जनालाई प्रहरीले पक्राउ गरेको छ ।

पक्राउ पर्नेमा भारतको दार्जेलिङका २७ वर्षीय अनुप प्रधान रहेको १ नम्बर प्रदेश प्रहरी कार्यालय विराटनगरले जनाएको छ । हिजो साँझ ७ः०० बजे काकडभिट्टाको मेचीपुलमा लागूऔषध नियन्त्रण ब्युरो र इलाका प्रहरी कार्यालय काकडभिट्टाको प्रहरी टोलीले चेकजाँच गर्ने क्रममा भारतबाट नेपाल आउदै गरेका प्रधानको साथबाट ६ ग्राम ब्राउन सुगर बरामद गरेको हो । 

प्रतिबन्धित ब्राउनसुगरसहित पक्राउ परेका प्रधानलाई इलाका प्रहरी कार्यालय काकडभिट्टाको हिरासतमा राखी थप अनुसन्धान भइरहेको प्रहरीले जनाएको छ ।