इटहरी: आफ्नै बाबुले बोकिरहेको १ वर्षकी बालिकालाई लिएर एक महिला फरार भएपछि प्रहरी महिलाको खोजीमा लागेको छ । 

विराटनगर–१३ रोडशेष चौकबाट एक वर्षीया बालिका लिएर एक महिला फरार भएकी हुन् । सोमबार बिहान रोडशेष चौकबाट बच्चाका बाबु दिपेन यादवको साथमा रहेकी छोरी एक महिलाले लिएर फरार भएको जिल्ला प्रहरी कार्यालय मोरङ्गले जनाएको छ । 

बच्चा खोसेर फरार भएकी महिला र मोरङ्गकै बुढीगंगा गाउँपालिका निवासी दिपेन यादवबीच चिनजान रहेको मोरङ प्रहरीको भनाइ छ  । चिनजानका आधारमा बच्चा दिएको भएपनि बच्चा २४ घण्टासम्म नल्याएपछि महिलाको खोजीकार्य सुरु भएको हो ।  बालिकालाई सकुशल फिर्ता ल्याउन पहल भइरहेको मोरङ्ग प्रहरीले बताएको छ । 

चिनजानका आधारमा बालिकाका बाबु दिपेन बच्चा लिएर रोडशेष पुगेका थिए । त्यहाँ चिया पसलमा चिया खाँदै ती महिलासँग कुराकानीसमेत भएको पाइएको छ । कम्प्यूटर इन्जिनियर रहेका यादव र बच्चा लिएर हिडेंकी महिलाबीच चिनजान रहेको पाइएपनि के नाता हो भन्ने भने खुलेको छैन । महिलाले सोमबार साँझ ७ः३० बजे बालिका आफूसँग रहेको भन्दै जानकारी गराएकी थिइन् । त्यसपछि राति पुनः म्यासेज पठाएको खुलेको छ तर महिला अहिले कहाँ छिन् भन्ने भने खुलेको छैन । 

प्रहरीले घटनाको सुक्ष्म अनुसन्धान भइरहेको जनाएको छ । बच्चालाई बाबुले गाडीमा लिएर रोडशेष चौक पुगेका बेला चिनजानकी महिलाले लिएर भागेको भन्ने उजुरी प्रहरीमा परेको थियो ।  प्रहरीले घटनामा संलग्नको खोजी र बालिकाको उद्धारका लागि अन्तर जिल्ला समन्वयसमेत गरेर पिछा गरिरहेको बताएको छ ।