इलामः चिया बगान व्यवस्थापनले श्रमजीवी ऐन कार्यान्वयन नगरेको भन्दै चिया मजदुर आन्दोलित भएका छन् । सरकारले २०७५ साउन १ गतेदेखि लागू हुने गरी घोषणा गरेको दैनिक भत्ता र महङ्गी भत्ता कार्यान्वयन नगरिएको भन्दै मजदुर आन्दोलित भएका हुन् ।

चिया मजदुर सम्बद्ध ३ वटा सङ्गठनले संयुक्त विज्ञप्ति जारी गरी विभिन्न चरणका आन्दोलनका कार्यक्रम सार्वजनिक गरेका छन् । उनीहरूले नेपाल सरकार, श्रम रोजगार तथा सामाजिक सुरक्षा मन्त्रालयले गत साउन १ गतेदेखि लागू हुने गरी चिया बगान र कारखानामा कार्यरत श्रमिकको आधारभूत पारिश्रमिक दैनिक रु २ सय ३१ र महँगी भत्ता रु १ सय ५४ कायम गर्न आन्दोलन गर्दै आएका छन् ।

श्रम ऐन कार्यान्वयनका लागि ट्रेड युनियनले गत असोज १० गते समेत चिया कारखाना बन्द गर्ने घोषणा गरेका थिए । सरकारले श्रम, रोजगार तथा सामाजिक सुरक्षा मन्त्रालयका सचिवको संयोजकत्वमा चिया क्षेत्र अध्ययन उच्चस्तरीय कार्यदल बनाएको थियो ।

कार्यदलले चिया क्षेत्र घोषणा गरिएका ५ वटा जिल्लाका चिया उद्योगी एवं मजदुरसँग छलफल गरी गत फागुन ३० गते सरकारलाई प्रतिवेदन बुझाएको थियो । अखिल नेपाल चिया मजदुर सङ्घ इलामका अध्यक्ष उमेश रेग्मीले उद्योगीले मजदुरको माग सम्बोधन नगरेका कारण पुनः आन्दोलन गर्नुपरेको बताए ।