पाँचथरः सडकको छेउमा रहेका पसलमा प्लाष्टिकका बट्टामा बाह्रै महिना राताम्य अकबरे खुर्सानी । मौसमअनुसार साग, इस्कुस, जरा, मटरकोसा, मुला, काउली, बन्दालगायत स्थानीय प्राङ्गारिक सागसब्जी । ललीपप, छुर्पी, घिउलगायत प्याकेटमा राखिएका स्थानीय दुग्ध उत्पादनहरू ।

विभिन्न प्रकारका प्राङ्गारिक चिया । चिमफिङ, टिम्बुर, खनक्पालगायत स्थानीय जडीबुटी । पूर्वी पहाडमा उत्पादन हुने मौसमअनुसारका किबी, सुन्तला, स्याउलगायत फलफूल । सबै वस्तु सजाएर राखिएका छन् ।

इलामबाट पाँचथर र ताप्लेजुङ जाने सबैलाई आकर्षित गर्छ यी सबै स्थानीय उत्पादन पाइने राँके बजारले । मेची राजमार्गमा प्रायः साना सवारी साधन गुड्छन् । ती सबै रोकिन्छन् यही आकर्षक बजारमा । पाँचथर र इलाम जिल्लाको सिमानामा अवस्थित मेची राजमार्गमा पर्ने राँके बजार स्थानीय उत्पादन पाउने बजारको रूपमा परिचित छ ।

बिक्रीका लागि आकर्षक ढङ्गबाट राखिएका स्थानीय उत्पादनले मेची राजमार्ग भएर यात्रा गर्ने सबैलाई लोभ्याउने गरेको छ । त्यसैले यहाँ स्थानीय उत्पादनको बिक्री पनि राम्रो छ । यहाँका प्राङ्गारिक उत्पादन खरीद नगर्ने कमै मात्र यात्रु हुन्छन् । यहाँ बिक्रीका लागि राखिएका वस्तुको स्वादले धेरैलाई लठ्याउँछ, खरीद गर्ने धेरैले भन्छन्, आहा ! राँके ।

पाँचथर र इलाम जिल्लामा फैलिएको राँके बजारमा दैनिक लाखौँको स्थानीय उत्पादन बिक्री हुने गरेको छ । यो बजारको आधार भनेकै मेची राजमार्ग हो । मेची राजमार्ग भएर हिँड्ने यात्रुका कारण यहाँको व्यवसाय लोभलाग्दो छ । यात्रा गर्ने अधिकांशलाई आकर्षण गर्न सक्नु यहाँका ब्यवसायीको खुबी हो ।

विगत १३ वर्षदेखि राँके बजारको मध्यभागमा स्थानीय उत्पादनको व्यवसाय गर्दै आएका चन्द्रवीर तामाङ सरदरमा दैनिक रु ७ हजार मूल्यको स्थानीय उत्पादन बिक्री गर्दै आएको बताउँछन् । ‘ललीपप, छुर्पी, अकबरे खुर्सानी सबैभन्दा बढी बिक्री हुन्छ’, तामाङले भने, ‘यो बाटोबाट यात्रा गर्ने प्रायः यात्रुले हाम्रा सामग्री खरीद गर्नुहुन्छ ।’

अर्का व्यवसायी नवीन नेम्वाङ दैनिक करीब रु २० हजार मूल्यको स्थानीय उत्पादन बिक्री गर्दै आएको बताउँछन् । स्थानीय उत्पादन सधैँ बिक्री हुने भए पनि बडादशैँ, तिहार र पाथीभरा मन्दिर दर्शनको समयमा अत्यधिक बिक्री हुने गर्दछ ।

पाथीभराको आशीर्वाद

प्रत्येक वर्षको वैशाख, असोज, कात्तिक, मङ्सिर र चैतमा मेची राजमार्ग भएर लाखौँ तीर्थयात्री ताप्लेजुङमा अवस्थित पाथीभरा मन्दिरमा दर्शन गर्न पुग्दछन् । पाथीभराबाट फर्केका यात्रु राँकेमा केही न केही सामग्री खरीद नगरी हिँड्दैनन् । त्यसैले यहाँका व्यापारी ठान्छन्, उनीहरूको व्यापार फस्टाउनुमा पाथीभरा माताकै आशीर्वाद छ ।

‘पाथीभरा जाने मौसममा बिक्री गर्नै भ्याइनभ्याई हुन्छ’, व्यवसायी नेम्वाङले भने, ‘वर्षदिनको कमाइसमेत ५ महिनामै हुन्छ ।’ यस्तै पूर्वी पहाड घर भई तराईका जिल्ला, ठूला शहर तथा राजधानीमा बस्नेहरू दशैँमा घर फर्कने गर्दछन् । पाथीभरा दर्शनको मौसम पनि यही समय हो । यस समयमा राँकेमा एकै दिनमा करोडौँको व्यापार हुने गरेको व्यवसायीको अनुभव छ ।

सधैँ धुम्म रहने, तुवाँलो लागिरहने राँके अत्यधिक ठन्डा हुने स्थानसमेत हो । यसकारण यहाँ धेरै सवारी रोकिन्छन्, यात्रुले खाना र नास्तासमेत खान्छन् । यात्रुले चिसो ठाउँमा खाना खाँदा छुट्टै आनन्द हुने बताउने गरेका कारण यहाँ धेरैले खाना खाने गरेको सवारी चालक राजु विश्वकर्माको भनाइ छ । यसरी खाना र नास्ता खाने यात्रुहरूले खोजीखोजी प्राङ्गारिक उत्पादन खरीद गर्ने गरेको विश्वकर्माको भनाइ छ ।

कृषकलाई सहज

फाल्गुनन्द गाउँपालिका–३ का कृषक राजकुमार नेम्वाङ राँके बजारका कारण स्थानीय कृषि उपज बिक्री सहज भएको बताउँछन् । आफूले वर्षेनी ३० देखि ४० क्वीन्टल अकबरे खुर्सानी बिक्री गर्दै आएको बताउने नेम्वाङ राँके बजारकै कारण आफूले चित्तबुझ्दो मूल्य पाएकामा खुशी भएको बताउँछन् ।

यस क्षेत्रका युवा वैदेशिक रोजगारीबाट फर्केपछि अकबरे खुर्सानीलगायत कृषि उपज उत्पादनमा केन्द्रित हुँदै गएको नेम्वाङको भनाइ छ । अकबरे खुर्सानी उत्पादनका लागि चर्चित फाल्गुनन्द गाउँपालिकाका खुर्सानी पूर्वी तराईका जिल्ला र राजधानी काठमाडौँमा निर्यात हुने गरेको छ ।