इटहरीः सुनसरीको धरानमा हिजो सोमबार भएका दुई छुट्टाछुट्टै सवारी दुर्घटनामा दुई जनाले ज्यान गुमाएका छन् ।

धरान ८ अन्तर्गत कोसी राजमार्गमा पर्ने जंगल क्षेत्रमा हिजो साँझ नम्बर नखुलेको गाडीको ठक्क्रबाट एक पैदल यात्री घाइते भएकोमा उपचारार्थ बीपी कोइराला स्वास्थ्य विज्ञान प्रतिष्ठान पठाइएको उपचारका क्रममा उनको हिजै राति ८ः३० बजे मृत्यु भएको प्रहरीले जनाएको छ । प्रहरीका अनुसार गम्भीर अवस्थामा भेटिएका मृतक अन्दाजी ३० वर्षीय पुरुष रहेपनि उनको परिचय खुल्न सकेको छैन । यसैगरी, दुर्घटना गराउने सवारीसमेत फेला नपरेकाले खोजी कार्य जारी रहेको प्रहरीको भनाइ छ ।

यसैगरी, धरानको भानुचौकमा बोलेरो गाडीको ठक्करबाट हिजो साँझ एक पैदल यात्रीको ज्यान गएको प्रहरीले जनाएको छ । दक्षिणबाट उत्तरतर्फ आइरहेको नम्बर नखुलेको गाडीको ठक्करबाट गम्भीर घाइते भएका अन्दाजी ३५ वर्षीय पुरुषलाई उपचारार्थ बीपी कोइराला स्वास्थ्य विज्ञान प्रतिष्ठान लगिएकोमा उपचारका क्रममा उनको राति ११ः१५ मा मृत्यु भएको प्रहरीको भनाइ छ । मृतक र दुर्घटना गराउने सवारी दुवैको पहिचान नखुलेको बताउँदै प्रहरीले सवारीको खोजी तिव्र पारिएको उल्लेख गरेको छ ।