इटहरीः झापाको कन्काई नगरपालिका ३ हिजो मृत अवस्थामा फेला परेका २२ वर्षीय अभिषेक चौधरीको हत्यामा संलग्न रहेको भन्दै प्रहरीले एक जनालाई पक्राउ गरेको छ ।

पक्राउ पर्नेमा कन्काई नगरपालिका ७ का २२ वर्षीय टल्के भनिने रबिन राजवंशी रहेको इलाका प्रहरी कार्यालय अनारमनीले जनाएको छ । अभियुक्तलाई हत्या भएको आठ घन्टामै हिजो बेलुका पक्राउ गरेको प्रहरीको भनाइ छ । प्रहरीका अनुसार पक्राउ परेका अभियुक्त राजवंशीले लागूऔषध सेवनका क्रममा विवाद हुँदा आफूले चौधरीलाई पछाडिबाट बन्चरो प्रहार गरी हत्या गरेको स्वीकार गरेका छन् ।

घटनामा प्रयोग भएको बन्चरो र घटनास्थलमा बरामद भएको अभियुक्त राजवंशीको कपडासमेत प्रहरीले फेला पारेको छ । कन्काई नगरपालिका ३ स्थित सुरुङ्गा खोलाको डिलमा शव फेला परेको जानकारी पाएलगत्तै जिल्ला प्रहरी कार्यालय झापाको टोली सुनसरीको धरानबाट मगाइएको तालिमप्राप्त कुकुरको सहयोगमा अनुसन्धानमा जुटेको थियो ।